✍️வருமானத்திற்கு மட்டுமே ஜக்காத் கொடுக்க வேண்டும் என்று ஒரு மௌலவி சொல்கிறார்.இது சரியா?

செல்வங்களின் மீதான ஜகாத் எனும் கடமைக்கொடையை நிறைவேற்றுவதில், ஈட்டக்கூடிய வருமானத்திற்கு மட்டுமே ஜகாத் வழங்கப்பட வேண்டும் என்றும், ஈட்டாத நிலையில் பல கோடி ரூபாய் மதிப்பிலான சொத்துக்கள் கைவசம் இருந்தாலும் அதற்கு ஜகாத் வழங்க வேண்டியதில்லை என்றும், ஏனெனில் 'சொத்துக்கள் பெருகவோ வளரவோ வேண்டும்; அப்படித்தான் ஹதீஸ்கள் கூறுகின்றன' என்றும் சாதிக்கும் தப்பெண்ணம் மார்க்கத்திற்கு முரணான ஒன்றாகும். இத்தகைய தவறான கருத்தினை மார்க்கத்தின் பெயரால் எவரும் முன்வைக்க இயலாது; ஏனெனில் வருமானம் வந்தால் மட்டுமே ஜகாத் கொடுக்க வேண்டும் என்ற நிபந்தனையோ சட்டமோ இஸ்லாமிய மார்க்கத்தில் எங்குமே கூறப்படவில்லை.

ஆடு, மாடு உள்ளிட்ட கால்நடைகளுக்கும் விவசாயத்திற்கும் மட்டுமே பெருகும் தன்மை எனும் இக்கருத்து பொருந்தும் எனக் கூறுவோரை நோக்கி, தங்கத்தின் மீதான ஜகாத் சட்டத்தை நாம் வினவலாம். தங்கத்தின் மீது ஜகாத் கடமையாக்கப்பட்டுள்ளது என்பதை மார்க்கத்தை அறிந்த யாவரும் அறிவர். தங்கமானது தானாகப் பெருகுமா, பத்து கிராம் தங்கத்தை வாங்கி வைத்தால் நாளையே அது பன்னிரண்டு கிராமாக மாறுமா, அல்லது வெள்ளியாவது தானாகப் பெருகுமா? எனினும், அவற்றிற்கு ஜகாத் உண்டு என்ற மார்க்கச் சட்டம் தெளிவாக அருளப்பட்டுள்ளதா இல்லையா?

அவ்வாறாயின், பெருகும் தன்மை கொண்ட ரூபாய்க்கு மட்டும் ஜகாத் உண்டு எனக் கூறிவிட்டு, சொத்துக்களை விலக்கி நிறுத்தும் இவர்களின் கூற்றுப்படி, பல கோடி மதிப்பிலான சொத்துக்கள் பெருகுவதில்லை என்பதால் அதற்கு ஜகாத் இல்லை என்று விவாதிப்பது அறியாமையாகும். வீடு, தோட்டம் போன்ற சொத்துக்களும், வாங்கி வைக்கப்படும் தங்கமும் தானாகப் பெருகப் போவதில்லை; ஒரு தோலா தங்கத்தை வாங்கி நூறாண்டுகள் வைத்திருந்தாலும் அது ஒரு தோலாவாகவே இருக்குமே அன்றி, நூற்றொரு தோலாவாக மாறப்போவதில்லை. நாற்பது ஆடுகள் நூறாகவும் இருநூறாகவும் பெருகுவது போலவோ, விவசாய விளைச்சலில் உற்பத்தி பெருகுவது போலவோ வந்தால்தான் ஜகாத் என்று வாதிடுவது முற்றிலும் தவறானதாகும்.

சொத்துக்களுக்கு ஜகாத் இல்லை என்றும், வருமானம் வந்தால் மட்டுமே ஜகாத் உண்டு என்றும் கூறுவதற்கு மார்க்கத்தில் எவ்வித ஹதீஸ்களும் சான்றாக இல்லை. வருமானம் வந்தால் மட்டுமே செலுத்துவதற்கு அது அரசுக்குச் செலுத்தும் வருமான வரியே தவிர, இறைவனால் விதிக்கப்பட்ட ஜகாத் அன்று. வருமான வரி கணக்கில் சிந்திப்பது போல ஜகாத்தைக் கருதுவது மார்க்க உணர்வற்ற பார்வையாகும்.

எனவே, 'சொத்துக்களுக்கு ஜகாத் இல்லை, பெருகும் வருமானத்திற்கு மட்டுமே உண்டு' என்று நபிகள் நாயகம் (ஸல்) அவர்கள் கூறியதாக எவரேனும் உரைத்தால், அக்கூற்று எந்த ஹதீஸ் நூலில், எவ்விடத்தில் இடம்பெற்றுள்ளது என்பதற்கான தெளிவான மார்க்க ஆதாரங்களைச் சான்றுகளுடன் பெற்றுத் தருமாறு அவர்களிடம் கேட்க வேண்டும்.