✍️சொத்துக்கு ஏற்ப ஜகாத் வேறுபடும்

இறைவன் திருக்குர்ஆனில் செல்வங்களுக்கு ஜகாத் கடமை என்பதைப் பொதுவாகக் குறிப்பிட்டுள்ளான். எனினும், அனைத்து வகையான சொத்துகளுக்கும் ஜகாத்தின் அளவு 2.5 விழுக்காடு (சதவீதம்) என்பதாக அமையாது; மாறாக, செல்வத்தின் தன்மைக்கேற்ப அது மாறுபடும்.

உதாரணமாக, ஒருவரிடம் ஆட்டுப்பண்ணை இருந்து, அது குறிப்பிட்ட எண்ணிக்கையை (நிஸாப்) எட்டிவிட்டால், அதற்குரிய கணக்கீட்டின்படியே ஆடுகளை ஜகாத்தாக வழங்க வேண்டும். நூறு, இருநூறு அல்லது ஐந்நூறு ஆடுகள் இருந்தால், அதற்கு இவ்வளவுதான் என்று மார்க்கத்தில் வரையறுக்கப்பட்ட அளவே கொடுக்கப்பட வேண்டும். 40 முதல் 120 ஆடுகள் வரை வைத்திருப்பவர் ஒரு ஆட்டை ஜகாத்தாகக் கொடுக்க வேண்டும் என்றுள்ளது. இக்கணக்கீட்டின்படி பார்த்தால், அது 2.5 விழுக்காடாக அமையாது. இதேபோன்று, மாடுகள் மற்றும் ஒட்டகங்களை வைத்திருப்போருக்கும் முறையே 40 மாடுகளுக்கு இவ்வளவு, 50 மாடுகளுக்கு இவ்வளவு என நிர்ணயிக்கப்பட்ட அளவுகளின் அடிப்படையிலேயே அவற்றின் ஜகாத் கணக்கிடப்பட வேண்டும்.

பெருமானார் (ஸல்) அவர்களின் தோழர்களான சஹாபாக்களின் காலத்தில் ஆடு, மாடு, ஒட்டகங்களே முதன்மையான செல்வங்களாகத் திகழ்ந்தன. அவர்கள் தங்களின் அந்தச் செல்வங்களிலிருந்தே ஜகாத்தை நிறைவேற்றினார்கள். ஆட்டிற்கான ஜகாத்தை ஆடாகவும், மாட்டிற்கான ஜகாத்தை மாடாகவும், ஒட்டகத்திற்கான ஜகாத்தை ஒட்டகமாகவும் கொடுத்தார்களேயன்றி, விழுக்காட்டு (சதவீத) அடிப்படையில் கணக்கிட்டு வழங்கவில்லை. எனவே, இவ்வகைச் செல்வங்களைத் தங்கம், வெள்ளி மற்றும் பணத்தைப் போன்ற 2.5 விழுக்காட்டுக் கணக்கீட்டிற்குள் கொண்டு வரக் கூடாது. மாறாக, ஒவ்வொரு செல்வத்திற்கும் மார்க்கத்தில் தனித்தனியாகக் கூறப்பட்டுள்ள அளவுகளையே நாம் பின்பற்ற வேண்டும்; அதுவே நம்மீது கடமையுமாகும்.

கால்நடைகளுக்கு ஜகாத் கூறப்பட்டிருப்பதைப் போன்றே, விவசாய விளைபொருட்களுக்கும் ஜகாத் (உஷ்ர்) கடமையாக்கப்பட்டுள்ளது. பேரீச்சம்பழம், நெல், கோதுமை, அரிசி என நிலத்திலிருந்து உற்பத்தியாகும் பொருட்களுக்கான ஜகாத் அளவு 2.5 விழுக்காடு அல்ல; அதற்கெனத் தனித்துவமான கணக்கீட்டு முறைகள் உள்ளன (இயற்கை நீர்ப்பாசனத்திற்கு 10 விழுக்காடும், செயற்கை நீர்ப்பாசனத்திற்கு 5 விழுக்காடும் ஆகும்).

கால்நடைகள் மற்றும் விவசாயம் மட்டுமன்றி, புதையல்களுக்கும் தனித்துவமான சட்டமே கூறப்பட்டுள்ளது. புதையல்மாகக் கிடைக்கும் செல்வத்திற்கு 20 விழுக்காடு (ஐந்தில் ஒரு பங்கு) ஜகாத்தாக வழங்கப்பட வேண்டும்; அங்கேயும் 2.5 விழுக்காடு என்ற கணக்கு பொருந்தாது. உதாரணமாக, நூறு ரூபாய் புதையல் கிடைத்தால், அதில் இருபது ரூபாயை ஜகாத்தாகக் கொடுக்க வேண்டும்.

இவ்வாறாக, குறிப்பிட்ட சில பொருட்களுக்கு மார்க்கத்தில் தெளிவான, தனித்துவமான விளக்கங்களும் அளவுகளும் வழங்கப்பட்டுள்ளன. இவை அல்லாத ஏனைய வியாபாரப் பொருட்கள் மற்றும் சேமிப்புச் சொத்துகளாக இருப்பின், அவற்றை இன்றைய பணமதிப்பின் அடிப்படையில் கணக்கிட்டு 2.5 விழுக்காடு ஜகாத் வழங்க வேண்டும். எந்தெந்தச் செல்வத்திற்கு எவ்வளவு ஜகாத் என்கிற விரிவான சட்டங்களை நாம் பிறகு விரிவாகக் காணலாம். எனினும், செல்வத்தின் வகைகளுக்கு ஏற்ப ஜகாத்தின் அளவுகளும் மாறுபடும் என்பதை இங்கு நாம் முதன்மையாக அறிந்துகொள்ள வேண்டும்.