✍️கால்நடைகளுக்கு ஜகாத் கொடுத்த பின் அதே கால் நடைகளுக்கு மீண்டும் ஜகாத் உண்டா

இஸ்லாமிய ஆட்சிமுறை மற்றும் நிருவாக அமைப்பின்கீழ், ஆடு, மாடு, ஒட்டகம் போன்ற கால்நடைகளுக்கான ஜகாத் எனும் கடமைக்கொடையை வசூலிக்கும் முறையானது தெளிவான, அநீதியற்ற சட்ட விதிகளை உள்ளடக்கியதாகும்.

கால்நடைகளுக்கு ஜகாத் வசூலிக்க அதிகாரிகள் வரும்பொழுது, ஒருவரிடத்தில் 150 ஆடுகள் இருக்கின்றன என்று வைத்துக்கொண்டால், அதற்குரிய கணக்கீட்டின்படி இரு ஆடுகள் ஜகாத்தாகப் பெறப்படும். ஏனெனில், மார்க்கச் சட்டத்தின்படி 40 முதல் 120 ஆடுகள் வரை ஒரு ஆடும், 121 முதல் 200 ஆடுகள் வரை இரு ஆடுகளும் ஜகாத்தாக வசூலிக்கப்படும். இங்கு 150 ஆடுகள் என்பது 200 வரையிலான கணக்கீட்டு எல்லைக்குள் அடங்குவதால், அவர் செலுத்திய இரு ஆடுகள் என்பது 200 ஆடுகள் வரையிலான பகுதி முழுமைக்கும் உரிய ஜகாத்தாகவே கருதப்படும்.

இதன்பின்னர், மறுமுறையும் ஜகாத் வசூலிப்பவர் வருகை தரும் பொழுது—அது மூன்று மாதங்களிலோ அல்லது ஆறு மாதங்களிலோ நிகழினும்—ஏற்கனவே வசூலிக்கப்பட்ட 150 ஆடுகளின் கணக்கை அடிப்படையிலிருந்து கழித்துவிட்டே எஞ்சிய கூடுதல் எண்ணிக்கைக்கு மட்டும் வசூலிக்க வேண்டும். இஸ்லாமிய அரசாங்கத்தில் ஜகாத் வசூலிப்பை ஒவ்வொரு ஆண்டும் குறிப்பிட்ட நாளில் துல்லியமாக ஒரே மாதிரியாக நடத்த வேண்டும் என்றோ, அவ்வாறுதான் ஆட்களை அனுப்ப வேண்டும் என்றோ மார்க்கத்தில் கட்டாயச் சட்டங்கள் ஏதுமில்லை. நாட்டின் தேவைக்கேற்பவும் நிர்வாக வசதிக்கேற்பவும் கலீபா அல்லது ஆட்சியாளர்கள் ஜகாத் வசூலிப்பவர்களைப் பல்வேறு பகுதிகளுக்கு அனுப்பி வைப்பர்.

அவ்வாறு மறுமுறை வசூலிப்பவர் வரும் பொழுது, அவ்விடத்தில் 200 அல்லது 300 ஆடுகள் இருப்பதாகக் கொள்வோம். வசூலிக்க வருபவர் 300 ஆடுகளையும் எண்ணிப்பார்த்துவிட்டு, 300 ஆடுகளுக்குமான முழு ஜகாத்தையும் கோர முடியாது. ஏனெனில், உரிமையாளர் ஏற்கனவே 200 ஆடுகள் வரையிலான எல்லைக்குரிய ஜகாத்தைச் செலுத்தி அச்செல்வத்தைத் தூய்மைப்படுத்திவிட்டார். எனவே, வசூலிப்பவர், "நீர் ஏற்கனவே 200 ஆடுகள் வரைக்குமான ஜகாத்தைக் கொடுத்துவிட்டீர்; தற்போது கூடுதலாக உள்ள 100 ஆடுகளுக்குரிய ஒரு ஆட்டை மட்டும் ஜகாத்தாகத் தாரும்" என்றுதான் கேட்க முடியுமே தவிர, ஏற்கனவே ஜகாத் அளிக்கப்பட்ட செல்வத்திற்கு மீண்டும் ஜகாத் கேட்க மார்க்கத்தில் எந்தவித ஆதாரமும் இடமும் இல்லை.

நவீனக் காலத்தில் வருமான வரி தாக்கல் செய்யும் பொழுது குடிமக்களும் அரசும் கணக்குகளைப் பராமரிப்பது போல, நபிகள் நாயகம் (ஸல்) அவர்களால் நிறுவப்பட்ட இஸ்லாமிய அரசாங்கத்திலும் ஜகாத் வசூலிப்பவர்களும் ஜகாத் வழங்குபவர்களும் துல்லியமான கணக்குகளைப் பராமரித்து வந்தனர். எந்தத் தேதியில் வந்து வசூலித்தார்கள், அப்பொழுது நம்மிடமிருந்த ஆடுகளின் எண்ணிக்கை என்ன, தற்போது கூடுதலாகப் பெருகியுள்ள எண்ணிக்கை எவ்வளவு என்ற அனைத்து விவரங்களும் பாதுகாக்கப்பட்டன.

உதாரணமாக, ஒருவர் வசூலிப்பவர் வரும் பொழுது 150 ஆடுகளுக்குரிய ஜகாத்தைக் கொடுத்துவிட்டார்; சில மாதங்களுக்குப் பிறகு மீண்டும் வசூலிப்பவர் வரும் பொழுது அவரிடம் 190 ஆடுகள் மட்டுமே இருக்கிறது என்றால், அவரிடமிருந்து ஜகாத் எதுவுமே வசூலிக்கப்பட மாட்டாது. ஏனெனில், அவர் ஏற்கனவே செலுத்திய இரு ஆடுகள் என்பது 199 ஆடுகள் வரை உள்ளடக்கியதாகும். "உம்மிடம் 40 ஆடுகள் கூடுதலாகப் பெருகியிருப்பினும், நீர் ஏற்கனவே 200 வரையிலான எல்லைக்குக் கொடுத்துவிட்டதால் உம்மிடம் வசூலிக்கப்பட மாட்டாது" என்றே அதிகாரி விலகிச் செல்வார்.

கால்நடைகள் குட்டி போடுவதன் மூலமாகவே ஜகாத் பெறத்தக்க அளவில் விரைவாகப் பெருகுகின்றன. ஒருவரிடம் 500 ஆடுகள் இருக்கும் பொழுது அதற்குரிய ஜகாத்தைப் பெற்றுச் சென்றுவிடுகின்றனர். ஆறு அல்லது பத்து மாதங்களில் அவை குட்டி போட்டு 800 ஆடுகளாகப் பெருகிவிடும் சூழலில், அடுத்த முறை அதிகாரி வரும் பொழுது 800 ஆடுகளையும் கணக்கில் கொண்டு ஜகாத் கேட்க முடியாது. ஏற்கனவே 500 ஆடுகளுக்குரிய பங்கு வழங்கப்பட்டு அச்செல்வம் தூய்மையாகிவிட்டதால், புதிதாகப் பெருகிய 300 ஆடுகளுக்குரிய மூன்று ஆடுகளை மட்டுமே ஜகாத்தாகப் பெற முடியும்.

வருடா வருடம் ஒரே செல்வத்திற்கு மீண்டும் மீண்டும் ஜகாத் பெற வேண்டும் என்ற நோக்கில் சிலர் எழுப்பும் வினாக்களுக்கு மார்க்கத்தில் இடமில்லை. ஜகாத்தின் முதன்மை நோக்கமே செல்வத்தைத் தூய்மைப்படுத்துவதுதான். ஒருமுறை உரிமையாளர் உரிய பங்கைக் கொடுத்துவிட்டால், அந்த எல்லை வரையிலான செல்வம் முற்றிலும் தூய்மையடைந்துவிடுகிறது. தூய்மையாக்கப்பட்ட செல்வத்தை மீண்டும் தூய்மைப்படுத்துமாறு வற்புறுத்துவதும், கொடுத்ததற்கே மீண்டும் மீண்டும் ஜகாத் கேட்பதும் அநீதியான செயலாகும்.

அதேபோன்று, இடையே ஏதேனும் இழப்புகள் ஏற்பட்டாலும் இதே கணக்கீடுதான் பொருந்தும். ஒருவர் 300 ஆடுகளுக்குரிய மூன்று ஆடுகளை ஜகாத்தாகக் கொடுத்த பிறகு, எதிர்பாராதவிதமாக இடையில் 200 ஆடுகள் இறந்துபோய், அவரிடம் 100 ஆடுகள் மட்டுமே எஞ்சியிருக்கிறது எனில், அதற்காக எவ்விதக் குழப்பமும் அடையத் தேவையில்லை. எஞ்சியிருக்கும் 100 ஆடுகளும் ஏற்கனவே ஜகாத் கொடுக்கப்பட்ட கணக்கிற்குள் அடங்குவதால், வசூலிப்பவர் அவரிடமிருந்து ஏதும் கேட்க மாட்டார்.

சுருங்கக் கூறின், ஆடு, மாடு, ஒட்டகம் போன்ற எவ்வகைச் சார்ந்த கால்நடைகளாக இருப்பினும், ஏற்கனவே ஜகாத் கணக்கிடப்பட்டு வசூலிக்கப்பட்ட எண்ணிக்கையைக் கழித்துவிட்டு, அதன்பின் புதிதாகக் கூடுதலாகப் பெருகிய செல்வத்திற்கு மட்டுமே ஜகாத் வசூலிக்கப்பட வேண்டும் என்பதே இஸ்லாமிய மார்க்கத்தின் நீதியான சட்டமாகும்.