மார்க்கக் கல்வியை ஊக்குவிப்பதற்காக போட்டி வைத்து பரிசுகள் வழங்கலாமா

மார்க்கத்தின் ஏதோ விசயத்தில் தேர்ச்சி பெற்றவர்கள் சில அமைப்புகள் உலக ஆதாயத்தைத் தருவதாக கூறி நடத்தும் போட்டிகளில் கலந்து பரிசைப் பெறலாமா?

பதில்

எந்த ஒரு வணக்கத்தையும் நற்செயலையும் அல்லாஹ்வின் திருப்தியைப் பெறுவதற்காகத் தான் செய்ய வேண்டும். உலக ஆதாயத்துக்காக செய்யக் கூடாது.

صحيح مسلم

حَدَّثَنَا يَحْيَى بْنُ حَبِيبٍ الْحَارِثِيُّ، حَدَّثَنَا خَالِدُ بْنُ الْحَارِثِ، حَدَّثَنَا ابْنُ جُرَيْجٍ، حَدَّثَنِي يُونُسُ بْنُ يُوسُفَ، عَنْ سُلَيْمَانَ بْنِ يَسَارٍ، قَالَ: تَفَرَّقَ النَّاسُ عَنْ أَبِي هُرَيْرَةَ، فَقَالَ لَهُ نَاتِلُ أَهْلِ الشَّامِ: أَيُّهَا الشَّيْخُ، حَدِّثْنَا حَدِيثًا سَمِعْتَهُ مِنْ رَسُولِ اللهِ صَلَّى اللهُ عَلَيْهِ وَسَلَّمَ، قَالَ: نَعَمْ، سَمِعْتُ رَسُولَ اللهِ صَلَّى اللهُ عَلَيْهِ وَسَلَّمَ يَقُولُ: " إِنَّ أَوَّلَ النَّاسِ يُقْضَى يَوْمَ الْقِيَامَةِ عَلَيْهِ رَجُلٌ اسْتُشْهِدَ، فَأُتِيَ بِهِ فَعَرَّفَهُ نِعَمَهُ فَعَرَفَهَا، قَالَ: فَمَا عَمِلْتَ فِيهَا؟ قَالَ: قَاتَلْتُ فِيكَ حَتَّى اسْتُشْهِدْتُ، قَالَ: كَذَبْتَ، وَلَكِنَّكَ قَاتَلْتَ لِأَنْ يُقَالَ: جَرِيءٌ، فَقَدْ قِيلَ، ثُمَّ أُمِرَ بِهِ فَسُحِبَ عَلَى وَجْهِهِ حَتَّى أُلْقِيَ فِي النَّارِ، وَرَجُلٌ تَعَلَّمَ الْعِلْمَ، وَعَلَّمَهُ وَقَرَأَ الْقُرْآنَ، فَأُتِيَ بِهِ فَعَرَّفَهُ نِعَمَهُ فَعَرَفَهَا، قَالَ: فَمَا عَمِلْتَ فِيهَا؟ قَالَ: تَعَلَّمْتُ الْعِلْمَ، وَعَلَّمْتُهُ وَقَرَأْتُ فِيكَ الْقُرْآنَ، قَالَ: كَذَبْتَ، وَلَكِنَّكَ تَعَلَّمْتَ الْعِلْمَ لِيُقَالَ: عَالِمٌ، وَقَرَأْتَ الْقُرْآنَ لِيُقَالَ: هُوَ قَارِئٌ، فَقَدْ قِيلَ، ثُمَّ أُمِرَ بِهِ فَسُحِبَ عَلَى وَجْهِهِ حَتَّى أُلْقِيَ فِي النَّارِ، وَرَجُلٌ وَسَّعَ اللهُ عَلَيْهِ، وَأَعْطَاهُ مِنْ أَصْنَافِ الْمَالِ كُلِّهِ، فَأُتِيَ بِهِ فَعَرَّفَهُ نِعَمَهُ فَعَرَفَهَا، قَالَ: فَمَا عَمِلْتَ فِيهَا؟ قَالَ: مَا تَرَكْتُ مِنْ سَبِيلٍ تُحِبُّ أَنْ يُنْفَقَ فِيهَا إِلَّا أَنْفَقْتُ فِيهَا لَكَ، قَالَ: كَذَبْتَ، وَلَكِنَّكَ فَعَلْتَ لِيُقَالَ: هُوَ جَوَادٌ، فَقَدْ قِيلَ، ثُمَّ أُمِرَ بِهِ فَسُحِبَ عَلَى وَجْهِهِ، ثُمَّ أُلْقِيَ فِي النَّارِ "،

மறுமை நாளில் மக்களில் முதல் முதலில் தீர்ப்பு வழங்கப்படுபவர் இறைவழியில் உயிர்த் தியாகம் செய்தவர் ஆவார். அவர் இறைவனிடம் கொண்டு வரப்படும்போது, அவருக்குத் தான் வழங்கியிருந்த அருட்கொடைகளை இறைவன் எடுத்துரைப்பான். அவற்றை அவர் அறிந்து கொள்வார். பிறகு, "அந்த அருட்கொடைகளில் நீ எவ்விதம் செயல்பட்டாய்?'' என்று இறைவன் கேட்பான். அவர், "(இறைவா!) உனக்காக நான் அறப்போரில் ஈடுபட்டு என் உயிரையே தியாகம் செய்தேன்'' என்று பதிலளிப்பார். இறைவன், "(இல்லை) நீ பொய் சொல்கிறாய். (நீ எனக்காக உயிர்த் தியாகம் செய்யவில்லை.) மாறாக, "மாவீரன்' என்று பேசப்படுவதற்காகவே நீ போரிட்டாய். அவ்வாறு சொல்லப்பட்டுவிட்டது. என்று கூறுவான். பிறகு இறைவனின் கட்டளைப்படி முகம் குப்புற இழுத்துச் செல்லப்பட்டு, நரகத்தில் எறியப்படுவார்.

பிறகு கல்வியைக் கற்று அதைப் பிறருக்கு கற்பித்து குர்ஆனைக் கற்றுணர்ந்த) ஒருவர் கொண்டுவரப்படுவார். அவருக்குத் தான் வழங்கியிருந்த அருட்கொடைகளை இறைவன் எடுத்துரைப்பான். அவற்றை அவர் அறிந்து கொள்வார். பிறகு "அந்த அருட்கொடைகளில் நீ எவ்விதம் செயல்பட்டாய்?'' என்று இறைவன் கேட்பான். அவர், "(இறைவா!) கல்வியை நானும் கற்று, பிறருக்கும் அதை நான் கற்பித்தேன். உனக்காகவே குர்ஆனை ஓதினேன்'' என்று பதிலளிப்பார். அதற்கு இறைவன், "(இல்லை) நீ பொய் சொல்கிறாய். "அறிஞர்' என்று சொல்லப்பட வேண்டும் என்பதற்காகவே நீ கல்வி கற்றாய்; "குர்ஆனை அறிந்தவர்' என பேசப்படுவதற்காகவே நீ குர்ஆனை ஓதினாய். அவ்வாறு சொல்லப்பட்டுவிட்டது)'' என்று கூறுவான். பிறகு இறைவனின் கட்டளைப்படி முகம் குப்புற இழுத்துச் செல்லப்பட்டு, அவர் நரகத்தில் எறியப்படுவார்.

பிறகு இறைவன் தாராளமான வாழ்க்கை வசதிகளும் அனைத்து விதமான செல்வங்களும் வழங்கியிருந்த செல்வந்தர் இறைவனிடம் கொண்டுவரப்படுவார். அவருக்குத் தான் வழங்கியிருந்த அருட்கொடைகளை இறைவன் எடுத்துரைப்பான். அவற்றை அவர் அறிந்து கொள்வார். பிறகு, "அந்த அருட்கொடைகளில் நீ எவ்விதம் செயல்பட்டாய்?'' என்று இறைவன் கேட்பான். அதற்கு அவர், "நீ எந்தெந்த வழிகளில் எல்லாம் பொருள் செலவழிக்கப்படுவதை விரும்புகிறாயோ, அந்த வழிகளில் எதையும் விட்டுவிடாமல் அனைத்திலும் நான் உனக்காக எனது பொருளைச் செலவிட்டேன்'' என்று பதிலளிப்பார்.

அதற்கு இறைவன், "(இல்லை) நீ பொய் சொல்கிறாய் "இவர் ஒரு புரவலர்' என பேசப்படுவதற்காகவே நீ இவ்வாறு செய்தாய். அவ்வாறு சொல்லப்பட்டுவிட்டது.'' என்று கூறிவிடுவான். பிறகு இறைவனின் கட்டளைப்படி முகம் குப்புற இழுத்துச் செல்லப்பட்டு, அவர் நரகத்தில் எறியப்படுவார்.

நூல் : முஸ்லிம் 3865

எந்த ஒரு நற்செயலையும் உலக ஆதாயத்துக்காக செய்தால் அதற்கு கூலி கிடைக்காது. மாறாக தண்டனை தான் கிடைக்கும் என்பதை இந்த நபிமொழியில் இருந்து அறிந்து கொள்கிறோம்.

ஆயினும் இறைவனுக்காக மட்டும் செய்த ஒரு நற்செயல் காரணமாக பரிசுகள் பொருளாதார வசதிகள் கிடைத்தால் அதைப் பெற்றுக் கொள்வது இதில் அடங்காது.

(பொருள் திரட்டுவதற்காக) பூமியில் பயணம் மேற்கொள்ள இயலாதவாறு அல்லாஹ்வின் பாதையில் தம்மை அர்ப்பணித்துக் கொண்ட ஏழைகளுக்கு (தர்மங்கள்) உரியன. (அவர்களைப் பற்றி) அறியாதவர், (அவர்களின்) தன்மான உணர்வைக் கண்டு அவர்களைச் செல்வந்தர்கள் என்று எண்ணிக் கொள்வார். அவர்களின் அடையாளத்தை வைத்து அவர்களை அறிந்து கொள்வீர்! மக்களிடம் கெஞ்சிக் கேட்க மாட்டார்கள். நல்லவற்றில் நீங்கள் எதைச் செலவிட்டாலும் அல்லாஹ் அதை அறிந்தவன்.

திருக்குர்ஆன் 2:273

ஒருவர் அல்லாஹ்வுக்காக அர்ப்பணித்துக் கொண்டால் அவருக்கு பொருளுதவி செய்வதற்கு முன்னுரிமை அளிக்கப்பட வேண்டும் என்று இவ்வசனம் கூறுகிறது. அளிக்கப்பட வேண்டும் என்றால் அதைப் பெற்றுக் கொள்ளலாம் என்ற கருத்து அதனுள் அடங்கி உள்ளது. அவரது நற்செயல்களை மதித்து அளிக்கப்படும் உதவிகளைப் பெற்றுக் கொள்வதால் அவர் அல்லாஹ்வுக்காக செய்யவில்லை என்று ஆகாது. அவரது நோக்கம் அல்லாஹ்வுக்கு உரியதாக இருக்க வேண்டும்.

போர்க்களத்தில் அல்லாஹ்வுக்காக போரிட்டவர்களுக்கு கனீமத் எனும் போர்ச் செல்வங்களை நபிகள் நாயகம் (ஸல்) அவர்கள் பிரித்து வழங்கியுள்ளார்கள். போரில் பங்கெடுத்த அனைத்து நபித்தோழர்களும் அதனைப் பெற்றுக் கொண்டார்கள். இப்படி பெற்றுக் கொண்டதால் அவர்கள் அல்லாஹ்வுக்காக போர் செய்யவில்லை என்று ஆகாது.

கனீமத் கிடைத்தாலும் கிடைக்காவிட்டாலும் அவர்கள் போரில் பங்கெடுத்து இருப்பார்கள்.

அந்த வகையில் குர்ஆனை ஒருவர் ஓதியது அல்லாஹ்வுக்காக இருக்க வேண்டும். ஆனால் அவரது நற்செயலைப் பாராட்டி வெகுமதிகள் வழங்கப்படுவதும் தவறல்ல. அதைப் பெறுவதும் தவறல்ல என்பதை இதிலிருந்து அறியலாம்.

ஒருவரது சேவையை மதித்து அதுபோல் மற்றவர்களும் முன்வருவதை ஊக்குவிப்பதற்காக போட்டிகள் நடத்தி பரிசுகள் வழங்குவது மார்க்கத்தில் தடுக்கப்பட்டதல்ல. இந்தப் பரிசுக்காகவே கற்றால் அது தான் மார்க்கத்தில் தடுக்கப்பட்டதாகும்.