ஆயிஷா ரலி திருமணம் வஹியின் அடிப்படையிலா? சமுதாய வழக்கப்படியா

கேள்வி

நீங்கள் ஏராளமான பயான்களில் கூறி வருகிறீர்கள்: ரசூலுல்லாஹ் ﷺ அவர்கள் ஆயிஷா நாயகி (ரழியல்லாஹு அன்ஹா) அவர்களை சிறு வயதில் திருமணம் செய்ததற்குக் காரணம், அந்தக் காலகட்டத்தில் மார்க்கம் முழுமையாக வெளிப்படுத்தப்படவில்லை என்பதாலும், அக்கால சமூக நடைமுறைக்கு ஏற்ப மக்கள் வாழ்ந்தார்கள் என்பதாலும் என்று கூறுகிறீர்கள். அந்தக் காலத்தில் சிறுமிகளைத் திருமணம் செய்வது சமூகத்தில் நடைமுறையில் இருந்தது என்றும் கூறுகிறீர்கள்.

அப்படியானால், ஸஹீஹ் ஹதீஸில் நபி ﷺ அவர்கள் கூறியதாக வரும் இந்தச் செய்தியை எவ்வாறு புரிந்துகொள்வது?

“(என்னிடம்) இறைத்தூதர் (ஸல்) அவர்கள் கூறினார்கள்: (நான் உன்னை மணப்பதற்கு முன்னால்) இரண்டு முறை உன்னை நான் கனவில் கண்டேன். ஒருவர் (உடைய தோற்றத்திலிருந்த வானவர்) உன்னை ஒரு பட்டுத் துண்டில் எடுத்துச் செல்கிறார். அப்போது அவர் ‘இவர் உங்கள் மனைவி” என்று கூறினார். உடனே நான் அந்தப் பட்டுத் துண்டை விலக்கிப் பார்க்கிறேன். அதில் இருந்தது நீ தான். அப்போது நான் (என் மனத்திற்குள்) ‘இக்கனவு அல்லாஹ்வின் தரப்பிலிருந்து வந்ததாயின், இதனை அல்லாஹ் நனவாக்குவான்” என்று சொல்லிக் கொண்டேன். ”

நூல்: ஸஹீஹுல் புகாரி, ஹதீஸ் எண்: 5078

அறிவிப்பவர்: ஆயிஷா (ரழியல்லாஹு அன்ஹா)

இவ்வாறான ஸஹீஹான ஹதீஸ் இருக்கும் நிலையில், “அந்தக் காலத்தில் இருந்த சமூக வழக்கத்தின் அடிப்படையில் தான் இந்தத் திருமணம் நடைபெற்றது” என்று மட்டும் எவ்வாறு கூற முடியும்?

ஏனெனில், இந்த ஹதீஸின்படி ஆயிஷா நாயகி (ரழியல்லாஹு அன்ஹா) அவர்களை நபி ﷺ அவர்கள் திருமணம் செய்வதற்கு முன்பே, அல்லாஹ்வின் ஏற்பாட்டின்படி அவர்களை நபி ﷺ அவர்களுக்கு கனவில் காட்டியிருக்கிறான்.

நபிமார்கள் காணும் உண்மையான கனவு இறைச் செய்தியின் ஒரு வகையாகும்.

எனவே, அக்காலத்தில் சிறுமிகளைத் திருமணம் செய்வது சமூகத்தில் நடைமுறையில் இருந்திருக்கலாம் என்பதை நாம் ஏற்றுக்கொண்டாலும், ஆயிஷா நாயகி (ரழியல்லாஹு அன்ஹா) அவர்களுடன் நபி ﷺ அவர்களின் திருமணம் அந்த சமூக நடைமுறையால் மட்டும் நடைபெற்றது என்று கூற முடியாது.

இந்த ஹதீஸின் அடிப்படையில், அந்தத் திருமணம் அல்லாஹ்வின் ஏற்பாட்டின்படியும் நடைபெற்றது என்பதை நாம் புரிந்துகொள்ள வேண்டாமா?

இந்நிலையில், “அது அக்காலத்தின் சமூக வழக்கம்” என்பதையும், “அது அல்லாஹ்வின் ஏற்பாட்டின்படி நடைபெற்றது. இதை எவ்வாறு சரியாகப் புரிந்து கொள்வது?

பதில்

நீங்கள் சொல்லும் ஹதீஸ் சரியானது தான். ஆனால் அதை நீங்கள் புரிந்து கொண்டது போல் புரிந்து கொள்ள முடியாது.

ஆயிஷா (ரலி) அவர்களை நபிகளாரின் கனவில் மனைவி என்று அல்லாஹ் காட்டினான் என்பதை நீங்கள் புரிந்து கொண்டது போல் புரிவதாக இருந்தால் இந்த வஹியின் அடிப்படையில் நபிகள் நாயகம் (ஸல்) அவர்கள் இதற்காக முன் முயற்சி எடுத்திருக்க வேண்டும்.

இப்ராஹீம் நபி அவர்கள் மகனை பலியிடுவதாக கனவில் கண்டதும் உடனே அதற்கு செயல்வடிவம் கொடுத்தார்கள். ஆனால் நபிகளார் அப்படி செயல்படுத்தினார்களா என்றால் இல்லை என்பதைப் பின்வரும் ஹதீஸ் கூறுகிறது

المعجم الكبير للطبراني

57 - حَدَّثَنَا مُحَمَّدُ بْنُ عَبْدَوسِ بْنِ كَامِلٍ السَّرَّاجُ، ثنا سَعِيدُ بْنُ يَحْيَى بْنِ سَعِيدٍ الْأُمَوِيُّ، ثنا أَبِي، عَنْ مُحَمَّدِ بْنِ عَمْرٍو، عَنْ يَحْيَى بْنِ عَبْدِ الرَّحْمَنِ بْنِ حَاطِبٍ، عَنْ عَائِشَةَ، قَالَتْ: لَمَّا تُوُفِّيَتْ خَدِيجَةُ قَالَتْ خَوْلَةُ بِنْتُ حَكِيمِ بْنِ أُمَيَّةَ بْنِ الْأَوْقَصِ امْرَأَةُ عُثْمَانَ بْنِ مَظْعُونٍ وَذَلِكَ بِمَكَّةَ: يَا رَسُولَ اللهِ أَلَا تَزَوَّجُ؟، قَالَ: «مَنْ؟» ، قَالَتْ: إِنْ شِئْتَ بِكْرًا، وَإِنْ شِئْتَ ثَيِّبًا، قَالَ: «فَمَنِ الْبِكْرُ؟» ، قَالَتْ: ابْنَةُ أَحَبِّ خَلْقِ اللهِ إِلَيْكَ عَائِشَةُ بِنْتُ أَبِي بَكْرٍ، قَالَ: «وَمَنِ الثَّيِّبُ؟» ، قَالَتْ: سَوْدَةُ بِنْتُ زَمْعَةَ آمَنَتْ بِكَ وَاتَّبَعَتْكَ عَلَى مَا أَنْتَ عَلَيْهِ، قَالَ: «فَاذْهَبِي فَاذْكُرِيهِمَا عَلَيَّ» فَجَاءَتْ فَدَخَلَتْ بَيْتَ أَبِي بَكْرٍ فَوَجَدَتْ أُمَّ رُومَانَ أُمَّ عَائِشَةَ، فَقَالَتْ: يَا أُمَّ رُومَانَ مَاذَا أَدْخَلَ اللهُ عَلَيْكُمْ مِنَ الْخَيْرِ وَالْبَرَكَةِ؟، أَرْسَلَنِي رَسُولُ اللهِ صَلَّى اللهُ عَلَيْهِ وَسَلَّمَ أَخْطِبُ عَلَيْهِ عَائِشَةَ، قَالَتْ: وَدِدْتُ انْتَظِرِي أَبَا بَكْرٍ، فَإِنَّهُ آتٍ، فَجَاءَ أَبُو بَكْرٍ، فَقَالَتْ: يَا أَبَا بَكْرٍ مَاذَا أَدْخَلَ اللهُ عَلَيْكُمْ مِنَ الْخَيْرِ وَالْبَرَكَةِ؟، أَرْسَلَنِي رَسُولُ اللهِ صَلَّى اللهُ عَلَيْهِ وَسَلَّمَ أَخْطِبُ عَلَيْهِ عَائِشَةَ، قَالَ: هَلْ تَصْلُحُ لَهُ وَإِنَّمَا هِيَ بِنْتُ أَخِيهِ، فَرَجَّعَنِي إِلَى رَسُولِ اللهِ صَلَّى اللهُ عَلَيْهِ وَسَلَّمَ، فَذَكَرْتُ ذَلِكَ لَهُ، فَقَالَ: " ارْجِعِي إِلَيْهِ فَقُولِي لَهُ: أَنْتَ أَخِي فِي الْإِسْلَامِ، وَأَنَا أَخُوكَ وَابْنَتُكَ تَصْلُحُ لِي "، فَأَتَتْ أَبَا بَكْرٍ فَقَالَ لِخَوْلَةَ: ادْعِي لِي رَسُولَ اللهِ صَلَّى اللهُ عَلَيْهِ وَسَلَّمَ فَجَاءَ فَأَنْكَحَهُ، وَأَنَا يَوْمَئِذٍ ابْنَةُ سِتِّ سِنِينَ

ஆயிஷா (ரலி) அவர்கள் கூறினார்கள்:

கதீஜா (ரலி) அவர்கள் இறந்தபோது, மக்காவில் இருந்த உஸ்மான் பின் மழ்ஊன் அவர்களின் மனைவியான கவ்லா பின்த் ஹகீம் பின் உமய்யா பின் அல்அவ்கஸ் (ரலி) அவர்கள், "அல்லாஹ்வின் தூதரே! நீங்கள் திருமணம் செய்து கொள்ளக் கூடாதா?" என்று கேட்டார்கள். நபி (ஸல்) அவர்கள், "யாரை?" என்று கேட்டார்கள். அவர்கள், "நீங்கள் விரும்பினால் கன்னிப் பெண்ணை, அல்லது விரும்பினால் விதவைப் பெண்ணை" என்றார்கள்.

நபி (ஸல்) அவர்கள், "கன்னிப் பெண் யார்?" என்று கேட்டார்கள். அவர்கள், "அல்லாஹ்வின் படைப்புகளில் உங்களுக்கு மிகவும் பிரியமானவரின் மகள் — அபூபக்ரின் மகள் ஆயிஷா" என்றார்கள்.

நபி (ஸல்) அவர்கள், "விதவை யார்?" என்று கேட்டார்கள். அவர்கள், "ஸம்ஆவின் மகள் சவ்தா. அவர் உங்களை நம்பிக்கை கொண்டு, நீங்கள் இருந்த நிலையில் உங்களைப் பின்பற்றினார்" என்றார்கள்.

நபி (ஸல்) அவர்கள், "நீங்கள் சென்று அவர்கள் இருவரையும் என்னைப் பற்றிக் குறிப்பிடுங்கள்" என்றார்கள்.

அவர்கள் வந்து அபூபக்ரின் வீட்டில் நுழைந்து, ஆயிஷாவின் தாயாரான உம்மு ரூமான் அவர்களைக் கண்டார்கள். அவர்கள், "உம்மு ரூமானே! அல்லாஹ் உங்களுக்கு எத்தகைய நன்மையையும் வளத்தையும் அளித்துள்ளான்!" "அல்லாஹ்வின் தூதர் (ஸல்) அவர்கள் ஆயிஷாவைப் பெண் கேட்க என்னை அனுப்பியுள்ளார்கள்" என்றார்கள்.

அவர்கள், "அபூபக்ரை எதிர்பாருங்கள்; அவர் வருவார்" என்றார்கள். அபூபக்ர் (ரலி) அவர்கள் வந்த போது, அவர்கள், "அபூபக்ரே! அல்லாஹ் உங்களுக்கு எத்தகைய நன்மையையும் வளத்தையும் அளித்துள்ளான்! அல்லாஹ்வின் தூதர் (ஸல்) அவர்கள் ஆயிஷாவைப் பெண் கேட்க என்னை அனுப்பியுள்ளார்கள்" என்றார்கள்.

அபூபக்ர் (ரலி) அவர்கள், "ஆயிஷா  நபிகளாருக்கு மணமுடிக்கத் தகுந்தவரா? ஆயிஷா ரலி நபிகளாரின் சகோதரனாகிய எனது மகள் தானே?" (சகோதரன் மகளை எப்படி திருமணம் செய்யலாம்) என்று கேட்டார்கள்.

எனவே, கவ்லா (ரலி) அவர்கள் அல்லாஹ்வின் தூதர் (ஸல்) அவர்களிடம் திரும்பிச் சென்று அதைக் கூறினார்கள். அதற்கு நபி (ஸல்) அவர்கள், "அவரிடம் திரும்பிச் சென்று கூறுங்கள்: நீங்கள் எனக்கு மார்க்க சகோதரர் தான். (இரத்த பந்தமுள்ள சகோதரன் அல்ல) உங்கள் மகள் எனக்கு மணமுடிக்கத் தகுந்தவர்" என்றார்கள்.

கவ்லா (ரலி) அவர்கள் அபூபக்ர் (ரலி) அவர்களிடம் வந்தார்கள். அபூபக்ர் (ரலி) அவர்கள் கவ்லாவிடம், "அல்லாஹ்வின் தூதர் (ஸல்) அவர்களை என்னிடம் அழையுங்கள்" என்றார்கள். நபி (ஸல்) அவர்கள் வந்தார்கள். அபூபக்ர் (ரலி) அவர்கள் ஆயிஷா (ரலி) அவர்களை நபி (ஸல்) அவர்களுக்கு மணமுடித்துக் கொடுத்தார்கள். அப்போது ஆயிஷா (ரலி) அவர்களுக்கு ஆறு வயது.

நூல் தப்ரானி

நபிகளார் ஆயிஷா ரலியை திருமணம் செய்ய எந்த முன் முயற்சியும் எடுக்கவில்லை. இப்படி ஒரு வஹீ செய்தி இருந்திருந்தால் அவர்களே நேரடியாக பெண் கேட்டு இருப்பார்கள்.

ஒருவர் கன்னிப் பெண் என்று கவ்லா ரலி சொன்ன பிறகு கூட அது ஆயிஷாவா என்று நபிகளார் கேட்கவில்லை. யார் என்று கவ்லாவிடமே கேட்கிறார்கள்.

அபூபக்ர் (ரலி) யிடம் பெண் கேட்டு அனுப்பும் போது அல்லாஹ்வின் வஹீ வந்துள்ளது என்று கூறி பெண் கேட்கவில்லை. அபூபக்ர் அவர்கள் நாம் இருவரும் சகோதரர்களாயிற்றே என்று தயக்கம் காட்டிய போது இது அல்லாஹ்வின் ஏற்பாடு என்ற பதிலைக் கூறவில்லை. இது ஹலால் தான் என்ற சட்ட விளக்கத்தைத் தான் கொடுத்தார்கள். அல்லாஹ் கனவின் மூலம் காட்டினான் என்று கூறி பெண் கேட்கவில்லை.

அப்படியானால் கனவில் காட்டப்பட்ட ஹதீஸை எப்படி புரிந்து கொள்வது?

நபிகள் நாயகம் (ஸல்) அவர்கள் கண்ட கனவுகள் துல்லியமாக விளங்கக் கூடியதாகவும் இருக்கும். சில கனவுகள் நபிகளே தவறாக விளங்கிக் கொள்ளும் வகையிலும் நடந்து முடிந்த பின் விளங்கக் கூடிய வகையிலும் இருக்கும்.

இதற்கு உதாரணமாக பின்வரும் ஹதீஸைக் கூறலாம்

صحيح مسلم

20 - (2272) حَدَّثَنَا أَبُو عَامِرٍ عَبْدُ اللهِ بْنُ بَرَّادٍ الْأَشْعَرِيُّ، وَأَبُو كُرَيْبٍ مُحَمَّدُ بْنُ الْعَلَاءِ - وَتَقَارَبَا فِي اللَّفْظِ - قَالَا: حَدَّثَنَا أَبُو أُسَامَةَ، عَنْ بُرَيْدٍ، عَنْ أَبِي بُرْدَةَ جَدِّهِ، عَنْ أَبِي مُوسَى، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: «رَأَيْتُ فِي الْمَنَامِ أَنِّي أُهَاجِرُ مِنْ مَكَّةَ إِلَى أَرْضٍ بِهَا نَخْلٌ، فَذَهَبَ وَهْلِي إِلَى أَنَّهَا الْيَمَامَةُ أَوْ هَجَرُ، فَإِذَا هِيَ الْمَدِينَةُ يَثْرِبُ،

"நான் மக்காவிலிருந்து பேரீச்ச மரங்கள் நிறைந்த ஒரு நிலத்திற்கு ஹிஜ்ரத் (புலம்பெயர்ந்து) செல்வது போல் கனவு கண்டேன். அது 'யமாமா' அல்லது 'ஹஜர்' ஆக இருக்கும் என்று என் எண்ணம் சென்றது (நான் ஊகித்தேன்). ஆனால், அது 'யத்ரிப்' எனும் மதீனா நகராகும்."

என்று நபிகள் நாயகம் (ஸல்) கூறினார்கள்.

நூல் : முஸ்லிம்

ஹிஜ்ரத் செய்யும் ஊர் குறித்து அல்லாஹ் காட்டிய கனவை மதீனா என்று நபிகள் புரியவில்லை. வேறு ஊரைத் தான் குறிப்பதாக அவர்கள் கருதினார்கள். மதீனாவுக்கு ஹிஜ்ரத் செய்ய கட்டளை வந்த போது தான் கனவின் விளக்கம் புரிந்தது.

கனவு அல்லாத வஹீ எப்படி துல்லியமாக இருக்குமோ அப்படி சில கனவுகள் இருப்பதில்லை என்பதை இதிலிருந்து அறியலாம்.

அது போல் தான் ஆயிஷா (ரலி) பற்றிய கனவும் துல்லியமானதாக இருக்கவில்லை. அவர்கள் சந்தேகிக்கும் வகையில் தான் இருந்தது.

இதை அந்த ஹதீஸின் வாசகமே தெளிவாக்குகிறது.

إِنْ يَكُنْ هَذَا مِنْ عِنْدِ اللَّهِ يُمْضِهِ அப்போது நான் (என் மனத்திற்குள்) ‘இக்கனவு அல்லாஹ்வின் தரப்பிலிருந்து வந்ததாயின், இதனை அல்லாஹ் நனவாக்குவான்” என்று சொல்லிக் கொண்டேன். ”

இது ஆயிஷா (ரலி)யை திருமணம் செய்வதைக் குறிக்கிறது என்று நபிகள் நாயகம் (ஸல்) அவர்கள் அதைப் புரியவில்லை.  இருந்தாலும் இருக்கலாம். இல்லாமலும் இருக்கலாம் என்று தான் புரிந்து கொண்டார்கள் என்பதை மேற்கண்ட வாசகம் உறுதி செய்கிறது.

இது அல்லாஹ்விடமிருந்து வந்ததாக இருந்தால் என்று நபிகள் கூறியதைக் கவனத்தில் கொள்ளவும்

இதை அல்லாஹ்விடமிருந்து வந்த துல்லியமான வஹியாக அவர்கள் கருதவில்லை. அதனால் தான் ஆயிஷா (ரலி) யை திருமணம் செய்ய எந்த முயற்சியும் எடுக்கவில்லை.

திருமணம் முடிந்த பின்னர் தான் கனவில் காட்டப்பட்டது அல்லாஹ்வின் புறத்தில் இருந்து வந்தது என்று புரிந்து கொண்டார்கள்.

நபிகள் நாயகம் (ஸல்) அவர்கள் இந்தக் கனவின் அடிப்படையில் திருமணம் செய்ய முயற்சிக்கவில்லை என்றால் அன்றைய சமுதாய வழக்கப்படி தான் திருமணம் செய்தார்கள் என்பது உறுதியாகின்றது. நடந்து முடிந்த பின் தான் கனவின் பொருளை அறிந்து கொண்டார்கள்.

எனவே நாம் கூறுகின்ற காரணம் சரியானது தான்.

இதை மற்றொரு செய்தியும் உறுதிப்படுத்துகிறது,

صحيح البخاري

7420 - حَدَّثَنَا أَحْمَدُ، حَدَّثَنَا مُحَمَّدُ بْنُ أَبِي بَكْرٍ المُقَدَّمِيُّ، حَدَّثَنَا حَمَّادُ بْنُ زَيْدٍ، عَنْ ثَابِتٍ، عَنْ أَنَسٍ، قَالَ: جَاءَ زَيْدُ بْنُ حَارِثَةَ يَشْكُو، فَجَعَلَ النَّبِيُّ صَلَّى اللهُ عَلَيْهِ وَسَلَّمَ يَقُولُ: «اتَّقِ اللَّهَ، وَأَمْسِكْ عَلَيْكَ زَوْجَكَ»، قَالَ أَنَسٌ: لَوْ كَانَ رَسُولُ اللَّهِ صَلَّى اللهُ عَلَيْهِ وَسَلَّمَ كَاتِمًا شَيْئًا لَكَتَمَ هَذِهِ، قَالَ: فَكَانَتْ زَيْنَبُ تَفْخَرُ عَلَى أَزْوَاجِ النَّبِيِّ صَلَّى اللهُ عَلَيْهِ وَسَلَّمَ تَقُولُ: زَوَّجَكُنَّ أَهَالِيكُنَّ، وَزَوَّجَنِي اللَّهُ تَعَالَى مِنْ فَوْقِ سَبْعِ سَمَوَاتٍ، وَعَنْ ثَابِتٍ: {وَتُخْفِي فِي نَفْسِكَ مَا اللَّهُ مُبْدِيهِ وَتَخْشَى النَّاسَ} [الأحزاب: 37]، «نَزَلَتْ فِي شَأْنِ زَيْنَبَ وَزَيْدِ بْنِ حَارِثَةَ»

ஸைனப் ரலி அவர்கள் மற்ற மனைவிகளிடம் பெருமை அடிப்பார்கள். அதாவது என்னை நபிகளாருக்கு அல்லாஹ் திருமணம் செய்து வைத்தான். உங்களை உங்கள் குடும்பத்தார் திருமணம் செய்து வைத்தார்கள் என்று மற்ற மனைவிகளிடம் பெருமை அடிப்பார்கள்.

நூல் : புகாரி 7420

எனது திருமணமும் அல்லாஹ்வின் வஹி அடிப்படையில் தான் நடந்தது என்று ஆயிஷா (ரலி) பதிலளிக்கவில்லை. திருமணம் நடந்தது உலக வழக்கப்படி தான். திருமணம் நடந்த பின் அந்தக் கனவு ஓர் முன்னறிவிப்பு என்று அவர்கள் கருதியதால் தான் எனக்கும் வஹீ மூலம் திருமணம் நடந்தது என்று மறுப்பு சொல்லவில்லை.