"மூன்று விஷயங்களைத் தாமதப்படுத்தக் கூடாது" - விரிவான ஆய்வு

"மூன்று விஷயங்களைத் தாமதப்படுத்தக் கூடாது" - விரிவான ஆய்வு

"மூன்று விஷயங்களைத் தாமதப்படுத்தக் கூடாது" என்ற ஹதீஸ் பலவீனமானதா?

இதில் வரும் 'ஸயீத் இப்னு அப்துல்லாஹ்' என்பவரைப் பற்றி பல அறிஞர்கள் அவர் யாரென்று தெரியாது (மஜ்ஹூல்) என்று கூறினாலும், இமாம் அல்-இஜ்லி அவரை 'நம்பகமானவர்' என்று சான்றளித்துள்ளதால் இதை ஏன் ஸஹீஹாக ஏற்கக்கூடாது? எவரும் எல்லாவற்றையும் அறிந்திருக்க முடியாது என்பதால் இந்த ஹதீஸை ஏற்கலாமா என்று கேள்வி எழுப்பி இது சரியான ஹதீஸ் என்று சிலர் கூறுகிறார்கள். இது சரியா?

இதில் இரண்டு விஷயங்கள் உள்ளன. ஒன்று, அறிவிப்பாளர்களில் உள்ள சிக்கல். இரண்டாவது மற்றும் மிக முக்கியமானது, இதன் கருத்து (Content) ஆபத்தானது மற்றும் இட்டுக்கட்டப்பட்ட பொருளைக் கொண்டது.

1. அறிவிப்பாளர் தொடர் (Chain of Narrators) முரண்பாடு:

 

سنن الترمذي

171 - حَدَّثَنَا قُتَيْبَةُ، قَالَ: حَدَّثَنَا عَبْدُ اللَّهِ بْنُ وَهْبٍ، عَنْ سَعِيدِ بْنِ عَبْدِ اللَّهِ الجُهَنِيِّ، عَنْ مُحَمَّدِ بْنِ عُمَرَ بْنِ عَلِيِّ بْنِ أَبِي طَالِبٍ، عَنْ أَبِيهِ، عَنْ عَلِيِّ بْنِ أَبِي طَالِبٍ، أَنَّ النَّبِيَّ صَلَّى اللَّهُ عَلَيْهِ وَسَلَّمَ قَالَ لَهُ: " يَا عَلِيُّ، ثَلَاثٌ لَا تُؤَخِّرْهَا: الصَّلَاةُ إِذَا آنَتْ، وَالجَنَازَةُ إِذَا حَضَرَتْ، وَالأَيِّمُ إِذَا وَجَدْتَ لَهَا كُفْئًا "

سنن الترمذي

1075 - حَدَّثَنَا قُتَيْبَةُ قَالَ: حَدَّثَنَا عَبْدُ اللَّهِ بْنُ وَهْبٍ، عَنْ سَعِيدِ بْنِ عَبْدِ اللَّهِ الجُهَنِيِّ، عَنْ مُحَمَّدِ بْنِ عُمَرَ بْنِ عَلِيِّ بْنِ أَبِي طَالِبٍ، عَنْ أَبِيهِ، عَنْ عَلِيِّ بْنِ أَبِي طَالِبٍ، أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ لَهُ: " يَا عَلِيُّ، ثَلَاثٌ لَا تُؤَخِّرْهَا: الصَّلَاةُ إِذَا أَتَتْ، وَالجَنَازَةُ إِذَا حَضَرَتْ، وَالأَيِّمُ إِذَا وَجَدْتَ لَهَا كُفْئًا " هَذَا حَدِيثٌ غَرِيبٌ، وَمَا أَرَى إِسْنَادَهُ بِمُتَّصِلٍ

திர்மிதியில் இந்த ஹதீஸ் 171 மற்றும் 1075 ஆகிய எண்களில் வருகிறது. 171-ல் திர்மிதி கருத்து ஏதும் கூறவில்லை. ஆனால் 1075-ல் அவரே ஒரு விமர்சனத்தை வைக்கிறார்: "இந்தத் தொடர் இணைக்கப்பட்டதாக (முத்தசில்) நான் கருதவில்லை; இதில் முறிவு உள்ளது" என்கிறார்.

இந்த முறிவை ஆராய்ந்த அறிஞர்கள், இதில் வரும் உமர் இப்னு அலீ என்பவர் தன் தந்தையிடமிருந்து இதைக் கேட்டதாகக் கூறுகிறார். ஆனால் இமாம் அப்துல் ஹக் அல்-இஷ்பிலி போன்றோர், "உமர் இப்னு அலீ தன் தந்தையிடமிருந்து எதையும் கேட்டதில்லை, ஏனென்றால் தந்தை மரணிக்கும் போது அவர் மிகச் சிறிய குழந்தை" என்கிறார்கள். அவர் அலீ (ரலி) அவர்களின் கடைசி மகன். ஹதீஸ்களைக் கேட்டுப் புரிந்து கொள்ளும் வயதில் அவர் அப்போது இல்லை.

அபூ ஹாத்திம் போன்றோர் "இவர் தந்தையிடம் கேட்டிருக்கலாம்" என்று உறுதிபடக் கூறினாலும், அதற்குரிய ஆதாரத்தைச் சமர்ப்பிக்கவில்லை. உமர் இப்னு அலீ எங்குமே "நான் என் தந்தை சொல்லக் கேட்டேன்" (ஸமிஃது) என்று கூறவில்லை.

மேலும், ஜுபைர் இப்னு பக்கார் என்பவர் இந்தச் சிறுவனுக்கு உமர் (ரலி) தான் பெயர் சூட்டினார் என்று கூறுவதை வைத்து அவர் பெரியவராக இருந்தார் என வாதிடுகின்றனர்.

«تاريخ الإسلام

«قَالَ الزُّبَيْرُ بْنُ بَكَّارٍ: حَدَّثَنِي مُحَمَّدُ بْنُ سَلامٍ، حَدَّثَنِي عِيسَى بْنُ عَبْدِ اللَّهِ بْنِ مُحَمَّدِ بْنِ عُمَرَ بْنِ عَلِيٍّ قَالَ: سَأَلْتُ أَبِي، فَحَدَّثَنِي عَنْ أَبِيهِ، قَالَ: عُمَرُ بْنُ عَلِيٍّ: ‌ولدت ‌لأبي ‌بعد ‌ما ‌اسْتُخْلِفَ ‌عُمَرُ، فَقَالَ لَهُ: يَا أَمِيرَ الْمُؤْمِنِينَ وُلِدَ لِي اللَّيْلَةَ غُلامٍ، فَقَالَ: هِبْهُ لِي. قَالَ: هُوَ لَكَ. قَالَ: قَدْ سَمَّيْتُهُ عُمَرَ وَنَحَلْتُهُ غُلامِي مُوَرِّقًا. قَالَ ابْنُ الزُّبَيْرِ: فَلَقِيتُ عِيسَى فَحَدَّثَنِي بِذَلِكَ.»

ஜுபைர் இப்னு பக்கார் இந்தக் தகவலை ஈஸா இப்னு அப்துல்லாஹ் என்பவரிடமிருந்து பெறுகிறார். இப்னு ஹிப்பான் கூற்றுப்படி, இந்த ஈஸா இப்னு அப்துல்லாஹ் பொய்யான தகவல்களைக் கூறுபவர். எனவே, அந்த வாதமும் செல்லாது. திர்மிதி கூறியது போல இந்தத் தொடர் முறிந்தது தான்.

2. கருத்தில் உள்ள முரண்பாடுகள் (Contradictions in Content):

இந்த ஹதீஸை ஸஹீஹாக ஏற்றால், நீங்கள் பல ஸஹீஹான ஹதீஸ்களை நிராகரிக்க வேண்டியிருக்கும்.

இந்த ஹதீஸ் "உடனே அடக்கம் செய்" என்கிறது. ஆனால் இப்னு ஹஜர் அவர்கள் 'தல்ஹீசுல் ஹபீர்' நூலில் விளக்குவது போல,

التلخيص الحبير

لَكِنْ يُعَارِضُهُ مَا رَوَاهُ مُسْلِمٌ مِنْ حَدِيثِ عُقْبَةَ بْنِ عَامِرٍ الْجُهَنِيِّ: «ثَلَاثُ سَاعَاتٍ كَانَ رَسُولُ اللَّهِ - صَلَّى اللَّهُ عَلَيْهِ وَسَلَّمَ - يَنْهَانَا أَنْ نُصَلِّيَ فِيهِنَّ، وَأَنْ نَقْبُرَ فِيهِنَّ مَوْتَانَا، حِينَ تَطْلُعُ الشَّمْسُ بَازِغَةً

இது ஸஹீஹான ஹதீஸ்களுக்கு முரணானது. சூரியன் உதிக்கும் போதும், உச்சியில் இருக்கும் போதும், மறையும் போதும் தொழுவதையோ, ஜனாஸா அடக்கம் செய்வதையோ நபிகள் நாயகம் (ஸல்) அவர்கள் தடுத்துள்ளார்கள் (முஸ்லிம்). என்று இப்னு ஹஜர் கூறுகிறார்.

ஒரு ஜனாஸா நண்பகலிலோ அல்லது சூரியன் மறையும் போதோ தயாரானால், இந்த ஹதீஸின் படி உடனே அடக்கம் செய்ய வேண்டுமா? இல்லை, காத்திருக்க வேண்டும். எனவே "தாமதிக்கவே கூடாது" என்பது தவறு.

நேரம் வந்தவுடன் உடனே தொழ வேண்டும் என்று இந்த ஹதீஸ் கூறுகிறது. ஆனால் புகாரியில் பல இடங்களில்

صحيح البخاري

,534 و 533 - حَدَّثَنَا أَيُّوبُ بْنُ سُلَيْمَانَ بْنِ بِلاَلٍ، قَالَ: حَدَّثَنَا أَبُو بَكْرٍ، عَنْ سُلَيْمَانَ، قَالَ: صَالِحُ بْنُ كَيْسَانَ، حَدَّثَنَا الأَعْرَجُ عَبْدُ الرَّحْمَنِ، وَغَيْرُهُ، عَنْ أَبِي هُرَيْرَةَ، وَنَافِعٌ مَوْلَى عَبْدِ اللَّهِ بْنِ عُمَرَ، عَنْ عَبْدِ اللَّهِ بْنِ عُمَرَ: أَنَّهُمَا حَدَّثَاهُ عَنْ رَسُولِ اللَّهِ صَلَّى اللهُ عَلَيْهِ وَسَلَّمَ أَنَّهُ قَالَ: «إِذَا اشْتَدَّ الحَرُّ فَأَبْرِدُوا عَنِ الصَّلاَةِ، فَإِنَّ شِدَّةَ الحَرِّ مِنْ فَيْحِ جَهَنَّمَ» 535, 536, 538, 3259,

கோடைக் காலத்தில் வெப்பம் குறையும் வரை லுஹர் தொழுகையைத் தாமதப்படுத்த வேண்டும் என்று நபிகள் நாயகம் (ஸல்) அவர்கள் கூறியுள்ளார்கள். "வெப்பம் கடுமையாகும் போது தொழுகையைத் தாமதப்படுத்துங்கள், ஏனெனில் கடும் வெப்பம் நரகத்தின் மூச்சுக் காற்றிலிருந்து உருவாவதாகும்" என்பது நபிமொழி.

லுஹர் தொழுகையை கோடை காலத்தில் தாமதப்படுத்துமாறு நபிகள் நாயகம் (ஸல்) அவர்கள் இட்ட கட்டளைக்கு முரணாக இந்த ஹதீஸ் அமைந்துள்ளது.

"தொழுகை நேரம் வந்தவுடன் உடனே தொழுதுவிட வேண்டும்" என்ற இந்த ஹதீஸ் இஷா தொழுகை தொடர்பான ஆதாரப்பூர்வமான நடைமுறைக்கும் முரணானது.

مسند أحمد

7412 - حَدَّثَنَا يَحْيَى، أَخْبَرَنَا عُبَيْدُ اللهِ، حَدَّثَنِي سَعِيدُ (1) بْنُ أَبِي سَعِيدٍ، عَنْ أَبِي هُرَيْرَةَ، قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: " لَوْلَا أَنْ أَشُقَّ عَلَى أُمَّتِي، لَأَمَرْتُهُمْ بِالسِّوَاكِ مَعَ الْوُضُوءِ، وَلَأَخَّرْتُ الْعِشَاءَ إِلَى ثُلُثِ اللَّيْلِ، أَوْ شَطْرِ اللَّيْلِ " (2)

நபி (ஸல்) அவர்கள் கூறினார்கள்: "எனது சமுதாயத்திற்குச் சிரமமாக இருக்கும் என்று நான் கருதவில்லை என்றால், இந்த இஷா தொழுகையை இரவின் மூன்றில் ஒரு பகுதி வரை (அல்லது பாதி இரவு வரை) தாமதப்படுத்தித் தொழுமாறே அவர்களுக்குக் கட்டளையிட்டிருப்பேன்." (ஆதாரம்: அஹ்மத்).

பல சந்தர்ப்பங்களில் நபிகள் நாயகம் (ஸல்) அவர்கள் இஷா தொழுகையைத் தாமதப்படுத்தி தொழுதுள்ளார்கள்.

صحيح البخاري

566 - حَدَّثَنَا يَحْيَى بْنُ بُكَيْرٍ، قَالَ: حَدَّثَنَا اللَّيْثُ، عَنْ عُقَيْلٍ، عَنِ ابْنِ شِهَابٍ، عَنْ عُرْوَةَ، أَنَّ عَائِشَةَ أَخْبَرَتْهُ، قَالَتْ: أَعْتَمَ رَسُولُ اللَّهِ صَلَّى اللهُ عَلَيْهِ وَسَلَّمَ لَيْلَةً بِالعِشَاءِ، وَذَلِكَ قَبْلَ أَنْ يَفْشُوَ الإِسْلاَمُ، فَلَمْ يَخْرُجْ حَتَّى قَالَ عُمَرُ: نَامَ النِّسَاءُ وَالصِّبْيَانُ، فَخَرَجَ، فَقَالَ لِأَهْلِ المَسْجِدِ: «مَا يَنْتَظِرُهَا أَحَدٌ مِنْ أَهْلِ الأَرْضِ غَيْرَكُمْ»

ஒரு முறை இஷா தொழுகையை மிகவும் தாமதப்படுத்தியதால் உமர் (ரலி) அவர்கள், "பெண்களும் குழந்தைகளும் தூங்கிவிட்டார்கள்" என்று அழைக்கும் வரை நபிகள் நாயகம் (ஸல்) அவர்கள் வரவில்லை.

"நேரம் வந்தவுடன் உடனே தொழு" என்ற ஹதீஸை மட்டும் பின்பற்றினால், "இஷாவைத் தாமதப்படுத்துவதே சிறந்தது" என்ற நபிவழியையும் (சுன்னத்தையும்), "வெப்பம் குறையும் வரை லுஹரைத் தாமதப்படுத்துங்கள்" என்ற நபிவழியையும் நாம் புறக்கணிக்க வேண்டிய சூழல் ஏற்படும்.

எனவே, நேரம் வந்தவுடன் உடனே தொழ வேண்டும் என்ற இந்த ஒரு ஹதீஸை ஏற்றால், மேற்சொன்ன அத்தனை ஸஹீஹான ஹதீஸ்களையும் மறுக்க வேண்டி வரும். இது ஏற்கத்தக்கதல்ல.

அந்த ஹதீஸில் "பெண்ணுக்குத் தகுந்த ஈடான (Suitable match) வரன் கிடைத்துவிட்டால் தாமதிக்காமல் திருமணம் செய்து வைக்க வேண்டும்" என்று கூறப்பட்டுள்ளது. இதிலும் நடைமுறை மற்றும் சட்ட ரீதியான சிக்கல்கள் உள்ளன:

இஸ்லாமியச் சட்டப்படி ஒரு பெண்ணுக்குத் திருமணம் செய்ய அந்தப் பெண்ணின் முழுமையான சம்மதம் அவசியம். தகுந்த வரன் என்று பெற்றோர் நினைத்தாலும், அந்தப் பெண்ணிற்கு அதில் விருப்பம் இல்லாமல் இருக்கலாம். அந்தப் பெண்ணைப் பேசிச் சம்மதிக்க வைக்கவோ அல்லது அவர் ஒரு முடிவெடுக்கவோ கால அவகாசம் தேவைப்படும். "உடனே செய், தாமதிக்காதே" என்ற கட்டாயம் பெண்ணின் உரிமையைப் பறிப்பதாக அமைந்துவிடும்.

எனவே கருத்து அடிப்படையிலும் இந்த ஹதீஸ் தவறானதாக அமைந்துள்ளது. இது ஆதாரப்பூர்வமான ஹதீஸ் வகையில் சேராது